– Den einaste gongen vi ser noko til kvarandre, er når du kjem att frå Studenten og klype på puppane mine i ti sekund. Det er for faen ikkje noko piknik på Fløyen!
Desibelnivået aukar i takt med raseriet til «Marianne», spelt av Ina Fjellhøy (22). Skyllebøtta er adressert Rocky. Hovudrolla, som i Immaturus heller vil henge på Garage med kompisen, enn med kjærasten og arbeidskameratane hennar på Metro. Når manuset til Martin Kellerman vert sett ut i live i Bergen, er det krydra med lokale referansar.
I ALLE SCENENE
Du har nok sett bladet i teikneseriehylla, eller på badet til ein i vennegjengen. Rocky, serien basert på den svenske teikneserieforfattaren Kellerman sitt eige liv, har vorte skodespel. Til helga finn antihelten vegen til scenekanten på Verftet.
– Eigentleg var det først no det gjekk opp for meg at det faktisk ikkje er ei einaste scene utan meg. Då forstod eg alvoret, seier hovudrolleinnehavar Vidar Hodnekvam.
Med erfaring frå stand up-miljøet i Bergen, er han budd på å gi skikkelsen Rocky liv. Immaturus-skodespelet er likevel ikkje utan utfordringar for studenten.
– Dette er første gong eg spelar i eit skodespel, og første gong eg spelar mot andre. Men no startar det å bli bra. Når replikkane sit, kan vi fokusere meir på å få flyt i stykket, seier medievitskapsstudenten.
– ÆREFRYKT
Regissøren skildrar oppsettinga av Rocky som intens, utfordrande og veldig morosam.
– Men sjølvsagt har vi heilt vilt med ærefrykt. Alle har si eiga oppfatning av korleis karakterane Rocky, Magne og Tommy er. Å finne dei rette skodespelarane har vore eit puslespel, men heldigvis har vi funne folk som har vore passande, seier ein nøgd regissør Kristian Knudsen.
Som skodespel skil «Rocky – The Big Payback» seg ut frå tidlegare Immaturus-produksjonar, ettersom dette ikkje er basert på eit gammalt stykke eller er produsert av studentane sjølve. Manuset er skrive av teikneserieforfattaren sjølv.
INGEN DYREMASKER
I serien har alle karakterane menneskekroppar med dyrehovud. At skodespelarane i Immaturus ikkje har masker, trur regissøren likevel ikkje skal by på nokre vanskar for dei i salen.
– Når du les serien, trur eg dei færraste tenkjer på at Rocky er ein hund. Dei som kjenner teikneserien, vil òg kjenne at karakterane, forklarar Knudsen.
Den danske regissøren vil ikkje røpe for mykje av handlinga i skodespelet, men kan avsløre at stykket tek føre seg livet til Martin Kellerman som leier fram til då han vart teikneserieforfattar.
– ALLTID LEST STRIPENE
Det kan verke som om alle skodespelarane har god kjennskap til teikneserien dei skal sette til livs.
– Eg har alltid lest stripene i Dagbladet. Det er litt skummelt å spele slik at ein er tru mot karakteren. Heldigvis er det mykje godt stoff i manus å støtte seg på, seier Ina Fjellhøy.
Print;)
;)
Studentteateret i Bergen